3 ka indibidwal lakip ang barangay kagawad arestado tungod sa pagbaligya sang pusil sa San Miguel, Iloilo
ILOILO — Arestado ang barangay kagawad kag duha pa ka indibidwal tungod sa pagbaligya sang pusil sa operasyon sang Criminal Investigation and Detection Group – Iloilo City Field Unit (CIDG) sa Brgy. 8 Poblacion, San Miguel kahapon, Hunyo 23.
Sa impormasyon nga nakuha sang Aksyon Radyo Iloilo news team sa CIDG, nabaklan sang police operatives ang mga arestado sang .45 caliber pistol nga may duha ka magazine kag lima ka rounds sang bala; 12-gauge shotgun kag bala.
Ginkilala ang mga arestado kanday alyas Ted nga incumbent barangay kagawad sang Brgy. 3 sa San Miguel; alyas Martin kag alyas Nita.
Nakapalagyo naman si alyas Joven nga upod sang tatlo sa ilegal nga aktibidad.
Nagdugay sang isa ka semana ang monitoring sang police sa mga arestado.
Magluwas sa mga pusil kag bala, lakip man sa na-recover sang CIDG ang salakyan nga gingamit sang mga arestado.
Yara sa kustodiya sang CIDG Field Office sa Mandurriao ang mga arestado kag natalana pasakaan sang kaso nga paglapas sa Republic Act 10591 ukon ang Comprehensive Firearms and Ammunition Regulation Act. — Aksyon Paula Elambayo