Mag-live in partner patay sang gintiro sa sulod sang ila balay sa Hamtic, Antique
Patay ang mag-live in partner sang gintiro sa sulod sang ila balay sa Brgy. Pili 1, 2, 3 sa Hamtic, Antique sang Hunyo 24 sang gab-i.
Ginkilala ang mga biktima kanday alyas Angelita, 32-anyos, kag alyas Jonathan, 51-anyos.
Suno kay Police Lieutenant Sirlan Mabaquiao, deputy chief sang Hamtic Municipal Police Station, nagapungko sa sala ang mga biktima samtang nagalantaw sa cellphone sang gintiro.
Sa imbestigasyon sang police, upod sang mga biktima nga nagapungko ang utod nga lalaki ni Jonathan. May deperensya sa paminsaron ang utod kag wala napilasan, suno sa police.
Sa pagpangusisa sang police, may nabatian nga lupok ang utod kag nakit-an nga natumba na si Jonathan kag iya live-in partner gani nagdalagan agud magpangayo sang bulig.
Nadugayan ang pagpangayo sang bulig sang utod tungod ginabanta sa 500 metros ang kalayuon sang mga balay sa barangay.
Nabukid nga parte sang Hamtic, Antique ang barangay kag kinahanglan lakton pasulod ang balay sang mga biktima suno sa police.
May igo sa wala nga dughan kag guya si Angelita, samtang may pilas sa ulo si Jonathan. Posible shotgun ang gingamit sang suspek sa pagtiro suno sa police.
Madamo sang anggulo nga ginasundan ang police pareho sang personal grudge kag away sa duta ukon sa mga propedad.
May duha ka persons of interest na ang police nga imbestigaran agud mahibaluan ang matuod nga natabo.– Aksyon Paula Elambayo
