Numero sang mga estudyante nga na-ospital tungod naglain ang pamatyag sang nakahaklo sang “daw luto nga bayabas” sa Brgy. Pis-anan, Sibalom naglab-ut sa 278
May nagdugang nga pulo ka mga estudyante nga gin-admit sa ospital sang naglain ang pamatyag pagkatapos may nahaklo nga “daw luto nga bayabas” sa Brgy. Pis-anan, Sibalom kahapon sang udto, Hulyo 3.
Suno kay Dr. Ric Noel Naciongayo sang Provincial Health Office tungod sang nadugang nga pulo ka admitted patient, yara na sa 278 ang mga naapektuhan nga estudyante sang Pis-anan National High School kag Central Elementary School. Ini ang base sa data sang Antique Provincial Health Office as of las-singko kahapon sang hapon.
Ang pulo ka mga nagdugang nga cases ang gin-admit sa Ramon Maza Sr. District Hospital sa Sibalom, Antique. Sa updated data, 81 na ang admitted sa Ramon Maza Sr. District Hospital; 7 ang naga-process nga i-discharge; kag 94 ang discharged na.
Samtang pito ang nagapabilin nga admitted sa Angel Salazar Memorial General Hospital kag gin-discharge na ang 89 nga una gin-report gina-obserbahan.
Sa kabug-usan, 88 ang admitted sa duha ka ospital sa probinsya. Tubtob subong, gina-imbestigaran pa sang Department of Health (DOH) ang nahaklo sang mg estudyante.
