Mangunguma sa Brgy. Pis-anan, Sibalom, Antique nag-ako nga nagpang-spray sang duha ka klase sang pesticides antes ang paglain sang pamatyag sang mga estudyante sang Hulyo 2

May nagpalapit nga mangunguma sa Task Force Pis-anan kag nag-ako nga nagpang-spray sang duha ka klase sang pesticides antes ang insidente sang paglain sang pamatyag pareho sang pagkalipong, pagsakit sang ulo, ukon pagsuluka sang mga estudyante sang Pis-anan National High School kag Pis-anan Central School sang Hulyo 2 tungod nakahaklo sang “daw luto nga bayabas.”

Ini ang ginbuyagyag ni Mr. Rodel Esler, Information Officer sang Task Forcer Pis-anan. Tungod sini, nag-conduct sang confirmatory test ang chemist sang University of Antique sa mga sample nga tanom kag duta kon amo gid man nga sahi sang pesticides ang ginatumod sang mangunguma nga iya gingamit sa iya pananom nga utanon kag humay.

Na-recover man sang task force ang sobra sang pesticide sa mangunguma. Suno kay Esler, kabahin sang padayon nga imbestigasyon ang pag-verify sa lokasyon sang talamnan agud ma-check ang direksyon sang hangin nga una gin-report sang DRRMO nga north-northwest, kag kon makadapya ini sa direksyon sang duha ka eskwelahan.

Sa pagpangusisa ni Esler, naga-aggid sa luto nga bayabas ang baho sang isa sa duha ka pesticides nga gingamit sang mangunguma.

Ginapadasig sang task force ang imbestigasyon kag ginapaabot nga makapaguwa sang resulta sa labing madali nga tion. — Aksyon Marvin Malificiar