Driver sang awto patay sang nakabunggo sa modernized jeep sa San Antonio, Oton
ILOILO—Dead-on-arrival sa ospital ang 21-anyos nga driver sang awto nga nakabunggo sa modernized jeep sa highway sakop sang San Antonio, Oton kaina sang aga.
Suno kay Lieutenant Colonel Abner Jordan, hepe sang Oton Municipal Police Station, napatay ang driver nga si alyas Amando nga residente sang Parara Norte, Tigbauan tungod sang naagum nga pilas sa nagkalain-lain nga parte sang lawas.
Sa imbestigasyon, halin sa syudad kag papuli sa Tigbauan ang driver sang awto samtang halin sa San Joaquin kag padulong sa Mohon ang modernized jeep nga may 13 ka pasahero.
Sa pagpangusisa sang police, pag-abot sa highway sang San Antonio, naglapaw sa pihak nga lane ang awto kag nakabunggo sa modernized jeep.
Ginpabutyag sang driver sang modernized jeep nga mahinay lang ang iya pagmaneho samtang madasig ang awto.
Gin-hold sa Oton police station ang 40-anyos nga driver sang jeep nga taga-San Joaquin. — Aksyon Farrah Mae Morano
