Ginaplanuhan sang Iloilo Festivals Foundation Incorporated ukon IFFI nga sayluhon sa Iloilo Sports Complex ang Dinagyang Tribes Competition sa masunod nga tuig.
Ini ang ginpahibalo ni artistic director, Professor Eric Divinagracia kadungan sang ginhiwat nga 100-day countdown sang kahiwatan sang Oktubre 22.
Suno kay Professor Divinagracia, nagkonsulta sila sa mga stakeholders kon nagakadapat na gid man nga ibutang sa sports complex ang aktibidad.
Sa subong, ginatun-an pa suno sa iya sang IFFI ang plano kag iplastar ini sa meeting sa masunod nga semana.
Sang 2012, una nga gindesignar nga judging area ang Iloilo Sports Complex sang Dinagyang Tribes Competition, apang madamo ang nagreklamo tungod nga malayo ang lugar.
Ginpabutyag ni Divinagracia nga sa moderno nga teknolohiya, pwede makabutang sang daku nga LED walls sa ISC agud mas madamo ang makalantaw sang Dinagyang.
Magluwas sini, nagkomporme man si Iloilo Governor Arthur Defensor, Jr. sa plano kag mangin ang mga mapasakop nga tribu.
Magluwas sa Tribes Competition kag Kasadyahan sa Kabanwahanan, balantayan man sa Dinagyang Festival 2026 ang ILOmination: Festival of Philippine Light Festivals, kag SadSad sa Calle Real nga pasakupan sang anum ka mga tribu.
“IBUTANG SA AGA IMBES NGA HAPON”
Ginakonsiderar sang IFFI nga i-schedule sa hapon imbes nga aga ang Dinagyang Tribes Competition sa masunod nga tuig
Suno kay Ms. Joyce Clavecillas, executive director sang IFFI, kon mahisugtan nga himuon nga isa sa mga judging areas ang Iloilo Sports Complex, mas pakamaayuhon nga ibutang sa hapon ang street dancing kag performance competition sang mga tribu.
Ginkonsiderar sang IFFI ang tuman ka init nga panahon sa aga tubtob sa udto, gani mas maayo nga hiwaton ini sa hapon.
Kon madayon, ibutang naman sa aga ang Sadsad sa Calle Real street dancing competition.
Pero gin-athag ni Clavecillas nga ginadiskusyunan pa gihapon ang plano kag indi pa final.
Sa 100-day countdown sang Dinagyang Festival 2026 kagab-i, ginpahayag ni Dinagyang Tribes Competition artistic director Professor Eric Divinagracia nga kon madayon ang plano, masugod la-1:30 sa hapon ang Tribes Competition kag ang ruta magahalin sa Iloilo Freedom Grandstand pakadto sa Iloilo Provincial Capitol kag sa Iloilo Sports Complex.
