ILOILO — PAVIA, ILOILO — Ginahingyo ni Iloilo 2nd District Congressman Michael Gorriceta ang pagbukas sang Ungka Flyover sa 24 oras ilabe na gid subong nga Disyembre.
Ini agud nga wala na sang pagpugok sang traffic sa service road.
Suno kay Gorriceta, nagadamo ang mga tawo nga nagasulod sa Iloilo City agud nga magtan-aw sang mga Christmas lights sa nagkalain-lain nga lugar sa siyudad kag nagadamo man ang nagapadulong sa Iloilo International Airport.
“Ang nakita ko nga mas nagadamo ang nagguwa kay ti nagalagaw ilabe na gid kun gab-i. Mas maayo gid nga buksan na gid lang 24 hours [ang flyover],” ang pahayag ni Gorriceta.
Ginpabutyag sang kongresista nga madamo sang nagapangabay may kaangtanan sa 24-oras nga pagbukas sang flyover.
Indi ma-intiendihan ni Gorriceta kun ngaa ginasiraduhan ang flyover pagkatapos sang oras nga gintalana buksan.
“Indi ko makita ang ponto bala nga pasiradhan sa traffic hours, nga pahuwayan o mapahuway ang flyover. Kay ti amo man sa gihapon sa masunod nga adlaw, pagka-aga gamiton man,” dugang pa ni Gorriceta.
Sang nagligad nga bulan, nagpadala sang sulat si Gorriceta kay DPWH 6 OIC, Engr. Sanny Boy Oropel may kaangtanan sa iya request apang tubtob subong wala pa makasabat ang ahensya.
