ILOILO — Napatay samtang ginabulong sa ospital ang 25-anyos nga lalaki sang ginbuno sang 17-anyos nga solterito sa Barangay Sapa, Miagao mga las-12:50 kaina sang kaagahon.
Suno kay Police Major Richard Lao, hepe sang Miagao Municipal Police Station, nagatindog sa guwa sang ila balay ang biktima nga si alyas Dol, sang gintupadan siya sang solterito kag ginbuno. Residente sang Barangay Baybay Sur ang suspek.
Dugang ni Lao, nakita sang iloy sang biktima ang natabu pero wala man sang komosyon ukon sabtanay sa tunga sang iya bata kag sang suspetsado antes ang pagpangbuno.
May okasyon sa barangay rason nga bisan gab-i na yara pa ang biktima sa guwa sang ila balay, suno sang police.
Nakaagum sang pilas sa wala nga parte sang dughan ang biktima nga amo ang gintunaan sang iya kamatayon.
Na-recover naman ang kutsilyo nga gingamit sang solterito sa pagpangbuno.
Nagapadayon ang imbestigasyon sang police samtang nagahulat sang discernment halin sa Municipal Social Welfare and Development Office (MSWDO) sa pagahimuon sa menor de edad nga yara na sa kustodiya sang Women and Children Protection Desk (WCPD). — Aksyon Maria Kayla Tingzon
