ILOILO — Isa ang totally damaged, samtang duha ang partially damaged sang nasunog sa Barangay Poblacion, New Lucena mga las-11:07 kagab-i, Hulyo 12.
Suno kay FO2 Norman Castillare, acting chief sang Intelligence and Investigation Unit sang New Lucena Municipal Fire Station, nagakatulog na ang tag-iya sang balay sa diin nag-umpisa ang kalayo gani wala na siya nakahibalo kon paano kag diin ini naghalin.
Tungod human sa light materials, madasig nga naglapta ang kalayo sa kaiping nga duha ka mga balay nga himo sa kapareho man nga materyales.
Nakabugtaw ang mga naga-istar sa amo nga mga balay sang may nagsinggit nga “sunog” kag nagbinuligay sabya sang tubig agud mapalong ang kalayo tubtob nag-abot ang mga bombero.
Nakaguwa ang tanan nga naga-istar sa tatlo ka mga balay antes magdaku ang kalayo gani wala sang napilasan.
Naglab-ot sa ginabanta P23,100 ang balor sang kahalitan sa sunog.
Padayon pa nga gina-imbestigaran sang mga bombero ang ginhalinan sang kalayo. — Aksyon Maria Kayla Tingzon
