ILOILO — Tatlo ka mga eskwelahan ang gin-report nga ginransak sa Sta. Barbara sang Oktubre 3.
Sa nakuha nga impormasyon sang Aksyon Radyo Iloilo news team, Sabado sang aga, Oktubre 4 nadiskubrehan nga ginransak ang duha ka elementary school kag isa ka high school.
Sabado sang aga, nadiskubrehan sang maestra nga bukas ang pwertahan sang principal’s office sa Tagsing-Buyo Elementary School kag nagailinukay ang mga gamit sa sulod. May kuhaon kuntani sa iya classroom ang maestra sang amo nga adlaw.
Gilayon nagpangayo sang bulig sa barangay ang maestra kag nag-report sa police.
Sa amo nga adlaw, nadiskubrehan man nga ginransak ang principal’s office sang Tagsing-Buyo National High School nga iping lang sang elementary school.
Sa impormasyon sang news team, gintulod ang air conditioner pasulod sa opisina tubtob nga nahulog kag ginsulod.
Lunsay wala sang may nakuha nga gamit sa duha ka mga opisina nga ginsulod.
Ginransak man ang opisina sa Balabag-Jibao-an Integrated Elementary School kon sa diin nakuha ang laptop nga gin-issue sang Department of Education.
Oktubre 8 sang ginransak man ang canteen sang Sta. Barbara Comprehensive National High School.
Gina-imbestigaran sang police ang insidente.
