Patay ang tatlo ka tuig nga bata nga lalaki sang nalasakan sang grader sa Brgy. Umilig, Buenavista, Guimaras pasado las-9 kaina sang aga.
Suno kay Punong Barangay Renante Lanzar nagasakay sa unahan sang motorsiklo ang bata samtang naga-drive ang iya amay kag naga-angkas naman ang iloy.
Sa pagpangusisa sang kapitan, nagasugat-anay ang motorsiklo kag ang grader.
Nagapadulhog ang motor kag nagapataklad naman ang grader.
Nakit-an na sang amay ang grader gani nagpahigad siya kag nagbahar.
May ginsipa siya nga bukol sang lubi ugaling nagdiretso sa panguna nga goma sang motor kag nalapakan gani natumba ang motorsiklo.
Nakaligid ang bata kag nagdiretso sa ginalabayan sang grader kag nalapakan.
Pag-responde sang kapitan sa lugar, nagalumpiga na ang iloy kag gina-alay-ay ang iya nga bata.
May patal nga injury nga sa ulo ang bata suno sa kapitan. Nagapangatubang sang kaso nga reckless imprudence resulting to homicide ang operator sang grader. — Aksyon Paula Elambayo
