ILOILO—Tatlo ang gindeklarar nga dead-on-arrival sa ospital sa pagpangtiro kag pagpangbuno sa Brgy. Tiringanan, Janiuay las-4:20 kaina sang hapon.
Sa initial nga report sang police, ang mga biktima amo kanday Jimmy, 66-anyos; Francisco, 56-anyos sang Brgy. Tiringanan, Janiuay; kag Raven, 32-anyos sang Brgy. Pangilihan, Janiuay
Na-aresto si Alejandro, 56-anyos.
Sa initial nga pagpangusisa, las-4:45 kaina sang hapon sang nakabaton sang impormasyon ang Janiuay police halin kay Punong Barangay Norberto Ajera sang Brgy. Tiringanan, Janiuay sa insidente.
Las-4:20 sa hapon samtang nagapungko si Jimmy ginpalapitan ni Raven kag ginbuno. Sang nagtambag si Barangay Tanod Francisco, nabun-an man siya ni Raven.
Nag-abot sa lugar ang manghod ni Jimmy nga si Alejandro kag gintiro si Raven.
Gindala sa Federico Roman Tirador Sr. Memorial Hospital sa Janiuay si Jimmy kag si Raven samtang gindala sa Dr. Ricardo A. Ladrido Memorial District Hospital sa Lambunao si Francisco.
Lunsay gindeklarar nga dead-on-arrival sa ospital ang tatlo.
Na-aresto naman si Alejandro paagi sa hot pursuit operation sang kapulisan.
Nagapadayon ang imbestigasyon sang pulis sa insidente.
Ginpabutyag ni Lieutenant Colonel Rolando Araño, spokesperson sang Iloilo Police Provincial Office (IPPO) nga daan nga hiligut-anon ang motibo sa krimen. — Aksyon Farrah Mae Morano
