Tatlo ang na-record sang Iloilo City Police Station 1 nga nagkalapilasan sa pagsigabong sang storage facility sang Regional Explosive Ordnance Disposal and Canine Unit 6 nga nahamtang sa Camp Achilles D. Plagata, General Luna St., Iloilo City las-10:15 subong nga aga.
Ginalakipan ini sang isa ka pulis kag duha ka mga sibilyan.
Ginkilala ang mga nagkalapilasan kanday Patrolwoman Shyrine Manuel sang EOD nga may pilas sa wala nga guya kag wala nga kamot; Fernando Sabidalas may pilas sa tuo nga tudlo kag lineman sang telecommunication company nga si John Mark Garcia nga naigo sang plywood.
Gindala sa ospital si Manuel, samtang ang duha ang gindapatan na sang first aid.
Suno sa initial investigation ni Police Staff Sergeant Raymund Rafio imbestigador sang Iloilo City Police Station 1, yara sa kusina sang EOD si Manuel samtang si Sabidalas naman ang naga-transact sa opisina sang traffic agud nga mag-settle sang iya papeles kag may gina-check naman si Garcia sa guwa sang ICPO.
Indi pa matumod ni Rafio ang rason sa pagsigabong sang nasambit nga opisina.
Nagapadayon pa ang imbestigasyon sang PP1 sa nagluntad nga insidente.
