ILOILO — 31 ka mga banwa sa probinsya sang Iloilo ang naapektuhan sang bagyo Opong base sa data sang Iloilo Provincial Disaster and Risk Reduction Management Office (PDRRMO).
Kalabanan mga banwa sa 5th district ang naapektuhan suno kay PDRRMO head retired Colonel Cornelio Salinas.
Nagapanguna ang San Dionisio sa may pinakadamo nga barangay nga nahalitan sang bagyo nga naglab-ut sa 26, ginasundan sang Batad nga may 24, Lemery nga may 23, Balasan nga may 13, Barotac Viejo may 10, Carles may pito, kag Sara nga may apat ka barangay.
Ginpahayag ni Salinas nga may pila man ka banwa sa 3rd kag 4th district nga apektado man pero mas malapit ang track sang bagyo sa 5th district gani daku ang kahalitan.
Magluwas sa material damage, may gin-report nga casualty sa Miagao tungod nalumos sa tunga sang paglaslas sang bagyo suno kay Salinas.
