ILOILO CITY—Dies y otso (18) ka pamilya sa Calubihan, Jaro ang nagpadulong sa evacuation center subong nga adlaw makaligad naglapaw ang tubig sa Dungon creek kag ginsul-ob sang baha ang pila ka mga balay.
Ginabug-usan sang 69 ka indibidwal ang apektado base sa record sang City Disaster Risk Reduction and Management Office (CDRRMO).
Treinta y kuwatro (34) naman ka mga barangay ang ginbaha kon diin sa Calubihan man na-record ang pinakataas nga lebel sang baha sa 20 tubtob 26 ka pulgada.
Ang iban pa nga barangay nga ginbaha ang Mohon kag Sta. Cruz sa Arevalo; Inday, Malipayon-Delgado, Zamora Melliza, kag Tanza Esperanza sa City Proper; Dungon A, Jaro; Divinagracia, Bantud, Nabitasan, Lopez Jaena Sur, kag Baldoza sa La Paz; Don Esteban, Lapuz Norte, Sinikway, Alalasan, kag Loboc sa Lapuz; Sta. Rosa, Hibao-an Sur, PHHC Block 17, Calajunan, Oñate De Leon, Pali-Benedicto, Airport, kag Dungon C sa Mandurriao; Infante, Calumpang, North Avanceña, San Juan, East Timawa, West Timawa, Taal, kag Cochero sa Molo.
Kaina sang aga naglabay sa kadutaan sang Guimaras kag Southern Panay ang bagyo Verbena, kag las-10 subong nga aga nasiplatan sa baybayon sang Hamtic, Antique.
Nagapadayon ang mga barangay emergency operation centers kag CDRRMO sa pag-account sang mga apektado nga barangay sa pagbaha kag pamilya nga nagpadulong sa evacuation center. — Aksyon Marvin Malificiar
