ILOILO — Dead-on-arrival sa ospital ang 36-anyos nga lalaki nga gin-report nga nag-amok sang natiruhan sang pulis sa plaza sang Oton, las-6 kaina sang aga.
Ginkilala ang napatay kay Marjune Milar sang Barangay Buray nga may pilas sa tiyan.
Suno kay Police Major Fernand Limbungan, hepe sang Oton Police Station, una nila nabaton ang report nga may lalaki nga naga-amok sa Barangay Buray.
Nakalab-ot sa plaza sang Oton ang lalaki kag ginrespondehan sang mga pulis.
Madamo sang naga-jogging kag naga-walking sa plaza sang Oton nga ginkulbaan tungod may dala nga kutsilyo ang lalaki, suno sa hepe.
Ginpabutyag pa ni Limbungan nga tuyo kuntani sang lalaki nga sarusuhon si Police Corporal Mark Vienard Villanueva rason nga natiruhan siya sang pulis.
Sa impormasyon sang Oton police sa pamilya, tatlo na ka adlaw nga wala nakakaon ang lalaki.
