ILOILO — Patay ang driver sang motorsiklo sang nabungguan sang traveling rice mill ukon baby cono sa Barangay Palanguia, Pototan kahapon sang hapon, Pebrero 6.
Ginkilala ang biktima kay Mario Trabado, 37-anyos sang Barangay Batuan, Pototan.
Napilasan sa ulo kag nagkalain-lain nga parte sang iya lawas ang biktima nga gindala pa sa ospital apang gindeklarar nga dead-on-arrival.
Suno kay Police Staff Sergeant Amando Caporal, imbestigador sang Pototan Police Station,ulihi na lang nga natalupangdan sang driver sang baby cono nga si John de Juan, 32-anyos ang motorsiklo sang biktima.
Na-alang-alang na ini rason nabungguan ang biktima.
Napilasan naman ang pahinante sang baby cono nga si Charlie Lariga, 58-anyos nga may pilas sa ulo kag tiil pero estable na ang kondisyon sa ospital.
Gin-custody sa Pototan Police Station ang driver sang baby cono.
