ILOILO — Dead-on-arrival sa ospital ang 38-anyos nga biktima nga natiruhan sa NHA sakop sang Brgy. Pili, Ajuy kagab-i, Marso 9.
Suno kay Police Captain Aileen Lacrite, OIC sang Ajuy Municipal Police Station, atubangay lang ang balay sang biktima nga si alyas Cadios, 38, kag sang suspek nga si alyas long hair, 55-anyos.
Sa imbestigasyon, yara na sa guwa sang iya nga balay ang suspek, ginbantayan ang biktima nga magguwa sa iya man nga balay kag gintiro.
Pagkatapos sang insidente nagsulod sa iya nga balay ang suspek kag gin-lock ang pwertahan, suno kay Lacrite.
Tungod sini suno kay Lacrite, nagpangayo sila sang bulig agud manegosyar nga mag-surrender gani naglibot ang pulis sa likod sang balay kag gin-aresto ang suspek mga las-9:09 na sa gab-i.
Sa pagpangusisa sang pulis may daan nga hiligut-anon ang suspek kag ang biktima. Medyo naka-inum sang makahulubog nga ilimnon ang suspek kaina, suno sa pulis.
May record man sa barangay ang suspek nga masami nga nagamaoy.
Yara na sa custody sang pulis ang suspek kag na-recover man ang 38 nga pusil. — Aksyon Farrah Mae Morano
