5 ka tuig nga bata patay sang nalumos sa RoRo port sa Lapuz

ILOILO CITY — Nahagaran lang sang iya duha ka pakaisa ang lima ka tuig nga bata nga napatay sang nalumos sa RoRo Port nga sakup sang Barangay Lapuz Norte, Lapuz mga las-5 kaina sang hapon.

Suno kay Police Captain Ma. Tonigrace Troncoso, officer-in-charge sang Iloilo City Police Station 8 sa Lapuz, tungod may barko nga nagapadulong, gulpi nagbalod gani gin-anod ang lima ka tuig nga bata nga si Junior, residente sang amo nga barangay.

Gintinguhaan pa siya nga salbaron sang iya pakaisa nga pulo ka tuig pero gulpi na siya nagsarurot. Nakita ini sang mga personnel sang Philippine Coast Guard kag gin-rescue si Junior.

Magluwas kay Junior kag iya pulo ka tuig nga pakaisa, upod man nila ang lima ka tuig nila nga pakaisa, lunsay indi kabalo maglangoy.

Ginsaway man sang mga tawo sa palibot ang tatlo nga indi magpaligo pero nagpadayon sila.

Gindala pa sa ospital si Junior pero wala na natabangan. — Aksyon Maria Kayla Tingzon