Nalumos kag napatay ang 55-anyos nga babaye sa Brgy. Paloc So-ol, Dumamgas sang ginpalid ang ila balay kag nag-apok sa punungan sang naglaslas ang bagyo Tino kahapon.
Suno kay Mr. Arande Detablan, head sang Dumangas Municipal Disaster Risk Reduction and Management Office (MDRRMO) nahamtang malapit sa pangpang sang nabilwa nga punungan ang balay sang babaye— mga duha ka kilometro ang kalayuon halin sa mayor nga karsada.
Mga las-11 kahapon sang aga nagmadlos ang hangin sa Dumangas kag ginpalid ang ila balay.
Nag-apok sa madalom nga porsyon sang punungan ang balay samtang ara sa sulod ang babaye upod ang iya bana kag duha ka kabataan.
Nagtalabog ang magpamilya apang nakalangoy ang duha ka kabataan kag ang ila amay.
Gilayon nga nangayo sang bulig ang isa ka bata samtang ginpangita naman sang isa pa ka bata ang ila iloy, upod sa ila amay.
Mga las-3 na sa hapon nakabalik ang bata nga nangayo sang bulig upod sa mga rescuers.
Bloated na ang tiyan sang babaye sang nakit-an. Gindala siya sa Dumangas District Hospital apang gindeklarar mga patay.
Ginpahayag ni Detablan nga bag-o lang na-operahan ang babaye gani posible nga wala makahulag sang mayo. — Aksyon Khenjo Terco
