ILOILO CITY—Na-rescue sang City Social Welfare and Development Office (CSWDO) Mandurriao ang anum ka menor-de-edad nga nagabaligya sang trapo sa Atria Park District sa San Rafael, Mandurriao.
Taga-Boulevard, Molo ang na-rescue nga mga bata kag gin-turnover sa CSWDO Molo agud mapangita ang ila mga ginikanan ukon guardians.
Kaina sang aga nag-deploy sang team ang CSWDO sa mga traffic lights sa Infante flyover, San Rafael, kag Taft North sa Mandurriao agud mag-monitor sa mga menor-de-edad nga nagabaligya sang trapo, prutas, utanon, kag iban pa.
Ini makaligad nagreklamo ang concerned citizen nga ginkurisan ang iya nga salakyan sang nagbalibad nga magbakal sang rabanos sa bata nga nagabaligya malapit sa traffic lights sa San Rafael.
Sa idalom sang Republic Act No. 9231 ukon Child Labor Law ginabawal ang pagpa-obra sa mga bata nga naga-edad 15-anyos panubo. — Aksyon Marvin Malificiar
