ILOILO CITY – Nagapati ang grupo nanday Iloilo City Councilor Plaridel Nava nga ginaproteksyonan sang Department of Public Works and Highways (DPWH) 6 officials ang International Builders Corporation (IBC) nga contractor sang wala napuslan nga Ungka Flyover.
Isa ini sa mga argumento sang grupo nanday Nava sa ginpasaka nga kaso criminal kag administratibo sa Office of the Ombudsman batuk sa mga involved sa nasambit nga proyekto.
Suno kay Nava, wala gid ginpadal-an sang DPWH sang notisya ang IBC agud pangayuan sang paathag kun ano ang natabo sa Ungka Flyover nga naga-usmod ang tanan nga 16 ka haligi. Wala man suno sa iya nag-impose sang sanction ang DPWH batuk IBC.
Sa baylo, gindepensahan pa sang DPWH ang contractor kag wala gin-id-idan kun may kapaltahan ang IBC. Dapat suno sa konsehal, ang interes sang publiko ang proteksyonan sang DPWH kag indi sang contractor.
“Wala sila ‘ya (DPWH) sang sense of accountability or responsibility, daw ila lang ‘ya kuwarta daw indi kuwarta ka mga pumuluyo. ‘Okay lang nag-usmod dira, ma-focus lang kita sa pag-repair, bay-an na lang naton kun sin-o ang may sala.’ Indi na ‘ya amo because what is involved is public fund. So amo na kun ngaa kinahanglan sila kasuhan. It’s because ang ila ‘ya nga tendency is to protect ‘ya sang interest sang contractor not the interest of the public,” suno kay Councilor Nava.
Lakip sa ginkasuhan sa paglapas sa Anti-Graft and Corrupt Practices Act kanday anay DPWH 6 Director Tiburcio Canlas; DPWH 6 Director Nerie Bueno; DPWH 6 Assistant Regional Director Jose Al Fruto; DPWH 6 Project Engineer Ormel Santos; Helen Edith Lee Tan nga presidente sang IBC; Allen Son Tan nga tag-iya sang IBC; kag mga John Does.
Samtang ang mga ginkasuhan naman sang Gross Neglect of Duty, Grave Misconduct, Conduct Prejudicial to the Best Interest of the Public Service akonkanday Canlas, Bueno, Fruto, Santos, kag mga John Does.
