6 ka pulis nga assigned sa Western Visayas ginkakas sa serbisyo tungod sa reklamo nga grave misconduct kag conduct unbecoming of a police officer

Anum ka police officer nga assigned sa Western Visayas ang gin-dismiss sa serbisyo.

Suno kay Atty. Michelle Yotoko, spokesperson sang National Police Commission (NAPOLCOM) 6, may gin-release nga desisyon ang NAPOLCOM En Banc may kaangtanan sa reklamo batok sa 24 ka pulis nga assigned sa Region 6. Grave misconduct kag conduct unbecoming of a police officer ang reklamo batok sa ila.

Sa 24 ka pulis, siyam ka reklamo ang gin-dismiss tungod kulang ang ebidensya, suno kay Atty. Yotoko.

Anum naman ka police officers ang gin-dismiss sa serbisyo, apat ang gin-demote sa ila ranggo, kag tatlo ang ginsuspender sang 20 ka adlaw. Isa ang ginsuspender sang anum ka bulan.

Indi pa ma-isa-isa sang NAPOLCOM 6 ang assignments sang kapulisan tungod ginaplastar pa ang data kag pagserbe sang order sa mga natungdan.

Ginpaathag ni Atty. Yotoko nga puwede pa maka-file para sa Motion for Reconsideration ukon maka-apelar ang gintumod nga mga pulis.