Anum ka mga wanted persons sa probinsiya sang Iloilo ang naaresto sang ginserbihan sang warrant of arrest subong nga adlaw, Hulyo 22.
Sa Brgy. Pasi, San Dionisio, las-10:10 kaina sang aga sang naaresto ang Top 1 Most Wanted Person-Municipal Level. Ginkilala ang arestado kay alyas Robert, 41-anyos.
Ginserbihan sang warrant of arrest si Robert sa kaso nga paglapas sa Republic Act 7610 ukon ang Special Protection of Children Against Abuse, Exploitation and Discrimination Act.
Gin-release sang kapulisan ang arestado sang nakapiyansa.
Sa Brgy. Poblacion Ilaya, San Enrique, arestado ang 20-anyos nga lalaki sa kaso nga Rape by Sexual Assault las-10:30 kaina sang aga.
Ginakabig sang police nga Top 1 Most Wanted Person-Municipal Level ang arestado.
Samtang, arestado ang mag-amay kag hinablos sa Brgy. Tagbac Sur, Oton sa kaso nga attempted homicide. Ginpahayag sang police nga sang nagligad nga tuig nahimo ang krimen sang may ginkastigo ang mga arestado.
Nakahingagaw nga makapiyansa ang mga arestado kaina sang hapon suno sa police.
Sa Brgy. Poblacion, Badiangan, arestado ang 32-anyos nga lalaki sa kaso nga estafa.
Detained sa Badiangan Police Station ang arestado. — Aksyon Paula Elambayo
