ILOILO CITY — 7 ka tribu mapaindis-indis sa Dinagyang Tribes Competition 2026
Nagpakita sang patilaw nga performance ang pito ka mga tribu sang Dinagyang Festival 2026 sa ginlunsar nga 100-day countdown sang kahiwatan.
Sa grand launching sang Oktubre 22, ginpakilala ang pito ka tribu nga amo ang Tribu Bulawanon sang Molo sang Bonifacio Integrated Elementary School; Tribu Ilonganon sang Jalandoni Memorial National High School; Tribu Taga Baryo sang Bo. Obrero National High School; Tribu Salognon sang Jaro National High School; Tribu Ilayanhon sang Graciano Lopez Jaena Elementary School; Tribu Pan-ay sang Fort San Pedro National High School; kag Tribu Paghidaet sang La Paz National High School.
Handum sang Tribu Paghidaet nga depensahan ang kampeonato.
Ang highlights sang Dinagyang Festival hiwaton sa Enero 23 tubtob 25 sa masunod nga tuig.
“QUEEN OF FESTIVALS”
Padayon nga pamatud-an sang Dinagyang Festival ang bansag nga reyna sang mga festivals sa bug-os nga Pilipinas.
Ini ang mensahe ni Mr. Angel De Leon, Jr., presidente sang Iloilo Festivals Foundation Incorporated sa grand launching kahapon.
Ang tema sang Dinagyang Festival sa masunod nga tuig “Bugay sang Ginuo, Bugal sang mga Ilonggo” nga suno kay De Leon, pagpakita sang gintingub nga pagtuo sang mga Ilonggo kag kon ano ka manggaranon sang kultura sang Iloilo.
Ginalauman suno sa iya, ang pagdagsa sang mga local kag international visitors sa tion sang kahiwatan.
Sa Enero 23, hiwaton ang ILOmination: Festival of Philippine Light Festivals; sa Enero 24 ang Kasadyahan sa Kabanwahanan; kag sa Enero 25 ang Dinagyang Tribes Competition.
