ILOILO — Nagaginhawa pa ang pito ka tuig nga bata nga babaye nga nasapwan sa sulod sang sako sa Barangay Tampucao, Lambunao gani gindala pa sa ospital pero napatay man.
Suno sa pakaisa sang bata nga si Tina, ila lola ang nakakita kay alyas Mimi sa sulod sang banyo.
Gintawag sang ila lola si Mimi tungod wala na nakabalik sa iya balay sang nagpauli sa ila naman kaugalingon nga balay.
Wala sang nagasabat gani nagsulod ang lola ni Mimi kag may nakita nga sako sa diin siya nasulod.
Gindala sa ospital si Mimi tungod nagaginhawa pa kag didto napatay.
Sa pagkahibalo ni Tina, may straw lace nga nahigot sa liug sang iya pakaisa.
Nakita niya man nga madamo sang kinarusan ang iya pakaisa.
Sa paglantaw sang pamilya, ginhimuslan si Mimi.
Wala sang upod si Mimi sa balay tungod nagatrabaho sa kaiping nga barangay ang iya amay bilang construction worker.
Bulagay na ang ginikanan ni Mimi kag may iban na nga pamilya ang iya iloy gani duha lang sila sang iya amay sa ila balay. — Aksyon Maria Kayla Tingzon
