8 ka tuig nga bata pilason sang nahulog sa building sang eskwelahan sa San Jose, Antique

Pilason ang walo ka tuig nga bata sang nahulog halin sa 3rd floor building sang Atabay Elementary School sa San Jose, Antique pasado las-12:00 kaina sang udto.

Suno kay Police Lieutenant Sheryl Sapinosa, deputy chief of police sang San Jose Municipal Police Station, nagsaka sa hagdan ang bata halin sa ground floor padulong sa 3rd floor.

Pag-abot sa 3rd floor, nagsaka sa rooftop ang bata paagi sa right fire exit sang building.

Sang yara na siya sa rooftop, liwat nagpanaog ang bata sa 3rd floor nga nag-agi naman sa left fire exit. Wala mabuksan sang bata ang pwertahan.

Duha ang fire exit sang building, suno sa police.

Ginalantaw sang police nga nagsaka ang bata sa metal railings sang building agud magpangayo sang bulig pero gulpi lang nahulog.

Gilayon gindala sa Angel Salazar Memorial General Hospital ang bata nga nakaagum sang pilas sa ulo.

Gin-refer sa Western Visayas Medical Center sa Mandurriao ang bata.

Grade 2 pupil ang bata nga naga-eskwela sa nasambit nga eskwelahan. — Source: Robert Nietes, ARI Trainee Reporter