Iloilo City: 2 ka adlaw nga APEC meeting, magasugod subong nga adlaw

By: Aine Grace Bravo

Ginpasiguro sang Local Organizing Committee nga preparado na ang syudad sa paghost sang duha ka adlaw nga Asia Pacific Economic Cooperation (APEC) meeting nga maga-umpisa subong nga adlaw.

Suno kay Mr. Ariel Castañeda, miembro sang komitiba, naplastar na ang tanan nga preparasyon kaupod ang National Organizing Committee kag Department of Finance. Nangin maayo suno sa iya ang feedback sang mga delegado base man sa gin-host nga panyapon sang syudad kagab-i.

Ginabanta sa 320 ka mga delegado ang ginapaabot nga matambong sa duha ka adlaw nga meeting sa diin 60% diri ang naghalin sa Pilipinas kag 40% naman naghalin sa iban nga member economies. Ginalakipan ini sang South Korea, Chinese-Taipei, Peoples Republic of China, Singapore, Indonesia, Canada, Australia, World Bank, International Monetary Dund kag Asian Development Bank.