Journalist Manuel Mejorada, Ginaduso nga Mapaidalum sa Preventive suspension si Mayor Jed Patrick Mabilog

Iloilo City — Ginaduso ni journalist Manuel Mejorada ang pagpa-idalum kay Mayor Jed Patrick Mabilog sa preventive suspension.

Kasunod ini sang paglakip sa alkalde sa narco list ni Presidente Rodrigo Duterte.

Gin-ako ni Mejorada nga gina-draft na sini complaint nga isumiter sa Office of the President paagi sa Department of Interior and Local Government 6.

Pasakaan ni Mejorada si Mabilog sang misconduct in office, gross negligence, dishonesty kag dereliction of duty.

Nalakip sa annexes suno kay Mejorada ang kopya sang Statement of Assets, Liabilities and Networth ni Mabilog halin 2004 tubtob 2014.

Makita suno kay Mejorada nga halin sa 7.4 million pesos nga networth sang 2004, naghabok ini sa 81 million pesos sang 2014.

Nagpamat-ud si Mejorada nga ipasaka ang complaint sa Office of the President bangud mahinay suno sa iya magdesisyon ang Ombudsman.

Ginpabutyag pa sini nga may “maninoy” si Mabilog kay Ombudsman Conchita Carpio Morales gani tinuig antes makapaguwa sang desisyon sa ginafile nga reklamo.

Dugang ni Mejorada, may gahum man ang presidente nga disiplinahon ang mga elected officials base sa local government code. (JoMaque)