ILOILO CITY GOVERNMENT GILAYON NGA NAG-AKSYON MATAPOS NATUKIBAN SA PAG-USISA SANG DPWH NGA RASUN SA PAGBAHA ANG PAGHIMO SA MGA DRAINAGE CANALS NGA BASURAHAN KAG SEPTIC TANK

Iloilo City – Kinahanglan ang kooperasyon sang publiko agud mangin madinalag-on ang mga proyekto sa syudad pareho sang gina-obra nga mga drainage canals.

Ginpaseguro ni City Administrator Atty. Hernando Galvez nga nagahulag ang syudad sa pagpamuno ni Mayor Jed Patrick Mabilog agud ma-identify ang mga problema kag masolusyunan.

Sa problema sang pagbaha, ginpa-athag ni Galvez nga nakahimo na sila sang inisyal nga aksyon kasunod sang ginpaguwa nga findings ni Engr. Rodney Gustilo, head sang DPWH City District Engineering Office, nga factors sa pagbaha bisan may drainage projects ang paghimo sa pila ka kanal nga basurahan kag septic tank.

Gin-una suno kay Galvez nga ginpasulusyunan ni Mabilog ang drainage canal malapit sa mga merkado. Ginafollow-up man sang proposed septage ordinance nga magaregulate sa mga pamalay kag establishimento komersyal nga wala sang septic tank.

Ginapa-inventory man ang mga balay nga wala septic tank agud makahimo sang solusyon.

(ATT)