Mga materyal kag method sa gina-obra nga mga karsada sa syudad, wala nagasunod sa ensakto nga specifications gani madasig maguba suno sa Ilonggo nga civil engineer

Iloilo City–Wala nagasunod sa insakto nga specifications ang mga materyales kag method sang pag-obra sang mga ginakaayo nga dalan sa syudad.

Ini ang paathag ni Civil Engineer Nilo Jardeleza kasunod sang pahayag sang Department of Public Works and Highways-City District Engineering Office nga nagalawig lang sang lima tubtub napulo ka tuig ang karsada gani ginabakbak kag gina-islan.

Suno kay Jardeleza, ang mga construction aggregates nga ginagamit subong, indi na pareho sang mga materyales sang una gani indi mapag-on ang pag-obra.

Natukiban ini ni Jardeleza kag iya mga kaupod sang nagconduct sang physical analysis sa mga aggregates halin sa mga suba sang probinsya.

Suno sa iya, sa baylo nga bato, dalipi na ang materials nga ginagamit samtang madali naman nga matunaw kon ibutang sa tubig ang balas kag diutay nga rock particles ang nagakabilin kon salaon. (AGB)