Terminal Supervisor sang Iloilo International Airport, nagpa-athag sa indi ma-agwantahan nga pagpugok sang trapiko pasulod sa paluparan

Cabatuan, Iloilo — Nagpa-athag si Mr. Arthur Parreño, terminal supervisor sang Iloilo International Airport, sa pagpugok sang trapiko pasulod sa paluparan.

Suno kay Parreño, ginhugtan nila ang seguridad para sa ikaayo sang mga pasahero. Kasunod man ini sang memorandum sang Civil Aviation Authority of the Philippines ukon CAAP nga nagabutang sang normal status sa heigthened alert bangud sang pamahug sa paluparan.

Naghingyo sang paghangop kag kooperasyon si Parreño bangud sa perwisyo nga dala sang mas hugot nga seguridad kag gin-athag nga tuyo lang nila masiguro nga hilway sa anuman nga disgrasya ukon kinagamo ang mga nagasulod sa paluparan. (AGB)