Kalaslon, patay sa aksidente sang motorsiklo sa Janiuay

Janiuay, Iloilo — Patay ang driver sang motorsiklo matapos nalasakan sang van sa Barangay Patong-Patong, Janiuay kahapon, Hunyo 11.

Gindala pa sa ospital si Esperedion Carsillar III, 31-anyos sang Barangay Ilawod, Calinog, apang wala gid natabangan bangud sa patal nga pilas sa agtang.

Suno kay Police Corporal Pio Estampador, imbestigador sang Janiuay Police Station, wala makontrol sang biktima ang manibela sang motorsiklo sa kurbada nga karsada rason nga natumba kag nalasakan sang nasumalang nga van nga ginamaneho ni Ronald Latosa sang Poblacion Ilaya, Lambunao.

Gin-custody sang Janiuay Police ang driver sang van.

Kalaslon na kuntani si Carsillar sa masunod nga bulan kag nag-selebrar man siya sang iya kaadlawan kahapon. (AGB)