EO nga nagadeklarar sa probinsya sang total ban sang mga baboy halin sa mga lugar nga apektado sang African Swine Fever, ginpaguwa ni Governor Arthur Defensor Jr

By: Aine Grace Bravo | September 19, 2019

via Mario Gelongo

Iloilo — Ginpaguwa na ni Governor Arthur Defensor Jr ang executive order nga nagamandu sang istrikto nga pagbantay sa mga nagasulod nga baboy sa probinsya.

Sa Executive Order Number 159 Series of 2019 nga ginpirmahan sang gobernador subong nga adlaw, ginmandu ang istrikto nga implementasyon sang veterinary quarantine procedures kag food safety measures sa buhi nga baboy, karne sang baboy, pork products kag by-products. Gindeklarar man ang temporaryo nga ban sa probinsya sang gintumod nga mga produkto halin sa mga pungsod ukon lugar sa Pilipinas nga gin-identify sang Department of Agriculture nga positibo sa African Swine Fever.

Una na ginpa-athag sang gobernador nga ginpaguwa niya ang EO bilang pagsunod sa Administrative Order 4 sang Bureau of Animal Industry matapos nakumpirmar nga may positibo nga kaso sang ASF sa pungsod.