(UPDATE) 149 kilos sang chemical nga natukiban sa abandonado nga planta sa Estancia, negatibo sa drug test sang Crime Laboratory

By: Aine Grace Bravo | December 19, 2019

via Aljohn Torreta

Estancia, Iloilo — Posible cleaning material ang na-recover nga 149.25 kilos sang wala pa mahibalu-an nga chemical sa fish processing plant sa Barangay Bolaqueña, Estancia.

Ini suno kay Captain Rene Obregon Jr., hepe sang Estancia Police Station.

Suno kay Obregon, nagpamangkot siya sa mga personnel sang iban nga mga fish processing plant sa ila lugar kag ginpahayag nila nga nagagamit sila sang chlorine sa pagpaninlo sa ila pasilidad.

Kasubong sa chlorine, puti man kag kasubong sa tawas ang itsura sang na-recover nga chemical.

Nag-negatibo sa drug test ang samples halin sa na-recover nga chemical, apang i-subject pa gid ini sa iban nga mga tests sa PNP headquarters agud mahibalu-an kun ano nga substance.

Dugang diri, i-subject man sang PDEA sa examination ang samples.

Nagrenta ang mga Taiwanese sa duta nga ginapanag-iyahan ni former Estancia Mayor Rene Cordero para magtukod sang fish processing plant apang wala ini nadayon.

2016 tubtob 2017 sang wala na nakita sa lugar ang mga nagtransaksyon kay Cordero.