Mga Ilonggo convicts nga GCTA beneficiaries, indi pa makapauli halin sa Sablayan Prison and Penal Farm sa Occidental Mindoro

By: Aine Grace Bravo | December 21, 2019

via Hotline

Iloilo City — Indi makaselebrar sang Paskuwa kaupod ang ila pamilya ang mga Ilonggo convicts nga nakaguwa bangud sa good conduct time allowance (GCTA) kag nag-surrender kasunod sang mandu ni Presidente Rodrigo Duterte.

Suno kay Mr. Roldan Cambronero sang Pavia, tatlo na sila ka bulan nga nagatiner sa training camp sang Bureau of Corrections sa Sablayan Prison and Penal Farm sa Occidental Mindoro pero tubtub subong, wala gihapon sang dinahum-dahom kun san-o sila makapauli.

Sa 28 sila nga taga-Iloilo kag Negros nga gindala sa Sablayan, mga 20 pa suno sa iya ang wala nakapauli bangud nagahulat sang resulta sang pag-review sa ila mga papeles halin sa BuCor sa Muntinlupa, Ginpahayag ni Cambronero nga magalawig pa ang ila pagtiner sa penal facility sa Occidental Mindoro bangud may impormasyon nga sa Enero naman i-review ang ila mga papeles.

Nagapanawagan naman si Mr. Ludovico de Torre, 67-anyos sang Bantud, Dumangas, nga mahatagan siya sang cellphone number sang iya bata agud ma-istorya niya kag mapadal-an siya sang allowance.

Ginpahayag ni De Torre nga pigado gid ang ila sitwasyon sa penal facility samtang nagahulat sang tawag halin sa BuCor.