2 miembro sang Philippine Marines, arestado matapos ginreklamo nga nagpalupok sang pusil sa Dingle

By: Aine Grace Bravo | December 21, 2019

via KhenJo Terco

Dingle, Iloilo — Arestado ang duha ka mga miyembro sang Philippine Marines nga gintudlo nagpalupok sang pusil sa Barangay Poblacion, Dingle pasado las 11:20 kagab-i, Disyembre 20.

Ginkilala ang duha kanday Sgt. Franz Dominik Principe, 40 anyos nga assign sa Lanao del Sur, kag Private 1st Class Vicente Catunao Jr., 30 anyos nga assign naman sa Tawi-Tawi. Pareho nga residente sang Barangay Abangay, Dingle ang duha.

Suno kay Capt. Fernando Punzalan Jr. hepe sang Dingle MPS, naglabay ang duha sa kiosko ni Jose Nicador Camanay kag ginsita ni Principe si Camanay sa wala mahibaluan nga rason.

Nagpangayo sang pasensya si Camanay kay Principe bangud nakit-an niya nga nakainom ang duha pero hinali siya ginsipa ni Principe kag gingabutan sang pusil.

Nagdalagan palayo si Camanay sang nakita nga may pusil si Principe.

Nagpalapit naman ang tanod nga si Leo Taladhay agud i-pacify ang sitwasyon pero siya ang ginpalukpan ni Principe. Nakahapa si Taladhay rason nga wala naigo.

Gintudlo man nga nagpalupok sang pusil ang upod ni Principe nga si Catunao pero gintu-on niya sa duta.

Na-aresto ang duha sang mga pulis nga naga-duty sa plaza kag sa bulig man sang mga tanod sa lugar.

Nakuha kay Principe ang 9MM, duha ka mga magazine kag 11 ka mga bala, samtang 45 caliber, duha ka mga magazine kag 12 ka mga bala naman ang nakuha kay Catunao.

May nakuha man nga fired cartridge nga compatible sa 9MM kag fired cartridge nga compatible sa 45 caliber sa lugar.

Magapangatubang sang kaso nga attempted homicide kag grave threat si Principe, samtang illegal discharge of firearms kag illegal possession of firearms naman ang kay Catunao bangud wala siya sang mapakita nga dokumento sang pusil nga iya dala.

Preso na ang duha sa Dingle Police Station.