NPA, nag-ako nga sila ang nag-‘harass’ sa mga pulis sa Tubungan

By: JoMaque | Disyembre 23, 2019, 1:40pm

Tubungan (UPDATE) – Gin-ako sang New People’s Army nga sila ang ‘nag-harass’ sa mga pulis sa boundary sang Barangay Buloc kag Bato sa Tubungan sang Disyembre 21.

Sa ginpaguwa nga pahayag sang Napoleon Tumagtang Command-Larangan Dose sang NPA, ginpahayag sang mga rebelde nga nabisto na nila sang Disyembre 20 ang deployment sang composite team sang 1st Provincial Mobile Force kag Regional Mobile Battalion apang ginhulat sa gihapon ang tropa sang gobyerno sa gin-antisipar nga direksyon.

May napilasan sa mga pulis pagkatapos sang engkwentro suno sa mga rebelde.

Dugang nila, nangin madinalag-on ang ila taktikal nga opensiba sa mga pulis kag ginapakita sini ang padayon ang pagpalangga sang masa sa ila grupo.

Una na ginpahayag sang Iloilo Police Provincial Office nga wala sang may napilasan sa tropa sang gobyerno pagkatapos sang engkwentro.

Disyembre 21 sang ginpintahan ang taytay nga naga-konekta sa Aganan kag Mali-ao sa Pavia.

Ginpinta sa taytay ang ‘Viva CPP-NPA-NDF’.