Masobra 1,000 ka pasahero nga mapauli sa Negros, stranded sa mga puerto sa Iloilo bangud sa Bagyo Ursula

By: Aine Grace Bravo | December 24, 2019

via Aksyon Reports Afternoon Edition

Dumangas, Iloilo — Masobra 1,200 ka pasahero ang na-stranded sa Dumangas RORO Port base sa na-record tubtob las-singko kaina sang hapon matapos ginkanselar ang biyahe sang mga sea vessels bangud sa Bagyo Ursula.

Suno kay Mayor Onal Golez, 150 sa mga pasahero, kalabanan mga may edad kag babaye, ang nagpakamaayo nga magsaylo sa Sapao Elementary School nga gin-provide nga evacuation center.

Nakapreparar naman ang LGU suno sa alkalde kun may mga pasahero pa sa puerto nga luyag magsaylo sa eskwelahan agud mas safe sila kag may mapasilungan kun mag-ulan.

Naghatag suno kay Mayor Golez sang pagkaun ang LGU kag nagdugang man sang bulig ang mga shipping lines, Philippine Ports Authority kag iban pa nga mga opisina kag grupo.

Ginpanugyanan ni Golez ang mga luyag magtabok nga indi magpamilit kag hulaton na lang ang advice sang Coast Guard kun san-o mabalik ang mga biyahe agud malikawan ang pagginutok sa puerto.

May na-stranded man nga ginabanta 140 ka pasahero sa Fastcraft Terminal sa Lapuz, Iloilo City nga nagpasimpalad kuntani makapauli sa Negros Island.

Gindala ang na-stranded nga mga pasahero sa Jalandoni Elementary School.