Pres. Duterte, magadesisyon subong nga adlaw kun palawigon pa ang ECQ sa mga lugar nga may mataas nga kaso sang COVID-19 pagkatapos sang Mayo 15 — Pres’l spox Roque
By: JoMaque | May 11, 2020
Manila – Desisyunan ni Presidente Rodrigo Duterte kun palawigon pa ang enhanced community quarantine sa mga lugar nga may mataas nga kaso sang COVID-19 subong nga adlaw, Mayo 11.
Suno kay Presidential Spokesman Harry Roque, subong nga Lunes ginalauman nga i-anunsyar sang presidente kun ano matabo pagkatapos sang Mayo 15.
Himuon ang announcement suno sa iya pagkatapos sang meeting sang Inter-Agency Task Force for the Management of Emerging Infectious Disease.
Sang Sabado, Mayo 9, nagsapol ang 17 ka mga alkalde sa Metro Manila kag ginsumiter nila sa IATF ang ila tatlo ka proposals sa diin ginlakip ang suhestiyon nila nga ipaidalom sa duha ka semana pa nga ECQ halin Mayo 15 tubtob 30 ang ila lugar .
Pero ginpahayag sang mga alkalde nga ginatugyan nila sa presidente ang pagdesisyon sa kapalaran sang ila lugar kag sundon kun ano ang iya mandu.
Una nga ginpaidalom sa ECQ ang Metro Manila sang Marso 15 pero ginpalapad ini kag gin-cover ang bug-os nga Luzon tubtob Abril 12.
Gin-extend ang Luzon lockdown tubtob Abril 30. Pagtakup sini, liwat nga gin-extend sa Metro Manila kag pila ka high risk nga lugar ukon mataas nga kaso sang COVID-19 tubtob Mayo 15.