Bucari Pine Forest sa Leon, liwat ginbuksan sa publiko

Leon, Iloilo — Liwat nga ginbuksan sa publiko ang tourist destination sa Bucari, ang ginakabig nga “Little Baguio” sa probinsya sang Iloilo.

Suno kay Leon Mayor Ma. Lina Holipas, kinahanglan anay maghapit sa Tourism Office sang banwa ang mga luyag magliwa-liwa sa Bucari bangud sang ginapatuman nga polisa kag mga health protocols.

Ginahaylo sang LGU-Leon ang pagpa-book antes magkadto sa Bucari bangud ginalimitahan ang numero sang mga guests.Istrikto nga ipatuman ang “no face mask, no face shield” policy, suno kay Mayor Holipas.

Base sa Executive Order Number 183-J ni Governor Arthur Defensor Jr., kinahanglan nga immediate members sang pamilya ukon household ang mahimo ma-akomodar sa mga resorts kag tourist destinations.

Kilala ang Bucari, Leon bangud sang matugnaw sini nga temperatura kag mountainous scenery.

Temporaryo nga ginsiraduhan sa publiko ang “Little Baguio” sang nagligad nga tuig bangud sang COVID-19 pandemic.