Mga turista nga maggamit sang peke nga RT-PCR test result agud makabakasyon sa Boracay, posible nga i-ban na sa isla

By: Aine Grace Bravo | February 8, 2021

AKLAN – Ginakonsiderar ni Malay, Aklan Mayor Frolibar Bautista ang “permanent ban” sa mga turista nga maggamit sang peke nga RT PCR test result agud makabakasyon sa Boracay.

Ini kun may madakpan pa liwat nga turista nga magpameke sang dokumento.

Pila na ka mga turista ang nadakpan nga naggamit sang peke nga RT PCR test result kag may nagpositibo pa sa ila sa COVID-19.

“Kung may ara pa gihapon nga [magpameke] sang ila [RT PCR test] result,  i-recommend ko na sa SB (Sangguniang Bayan) for declaring that person as ‘persona non-grata.’ So, meaning i-ban siya sa Boracay,” suno kay Bautista.

Base sa record sang Aklan Provincial Government, naglab-ut na sa 30 ang nadakpan nga naggamit sang peke nga RT PCR test result.

Nauna na nga ginapakasuhan sang Department of Tourism (DOT) ang mga naggamit sang peke nga resulta. –via Ariel Solacito