12-anyos nga bata nga babaye, patay sang nalumos sa creek sa Pavia

By: Aine Grace Bravo | February 9, 2021

PAVIA, Iloilo – Wala natabangan ang 12-anyos nga bata nga babaye sang nalumos sa creek sa boundary sang barangays Balabag kag Pandac, Pavia kahapon, Pebrero 8.

Suno kay PMS John John Serra sang Pavia Police Station, naghagaray ang walo ka kabataan nga magpaligo sa creek lakip ang 12-anyos nga bata.

Sang nag-abot na sila sa creek, gulpi nga naglumpat ang bata kag wala nakabutwa.

Nagpangayo sang bulig ang mga kaupdanan niya sa 15-anyos nga solterito, nga amo ang nagsalom tubtob nakit-an ang bata.

Nagresponder man ang Pavia Emergency Response Team sa lugar kag gintinguhaan pa nga ma-revive ang bata pero gindeklarar nga napatay. –via Jorge Cabrera