Konsumedor nga ginreklamo nagpanapungol sang disconnector sang MORE Power, nag-ako nga na-impito lang siya

Iloilo City—Ginrason ni Mr. Joel Dofitas sang Javellana Extension sa Jaro nga na-impito siya kabangdanan natapungulan niya ang disconnector sang MORE Electric and Power Corporation kahapon, Marso 15.

Suno kay Dofitas, gin-imbukada gid sa iya ni Kevin James Cajilig nga utdan sila sang kuryente kabangdanan wala niya napunggan ang iya kaugalingon, “Daw na-impito [ako] siguro kay ang approach bala. Nami tani ang approach, ‘good afternoon’ galeng ang sugpon niya, ‘disconnection ni sir.’ Tani daw [maayo] gawa bala…iya ya disconnection, gabayad man ko muh. May sala man ko. Gaayo ko tani nga [March] 22 ang due bayran ko man tanan. Ang sabat niya, ‘ah sa MORE lang kamo reklamo, mang-utod ko. May sala man ko…ano bi kay daw kainit man kahapon, ti sige lang.”

Nakuhaan sang video ang natabu nga tapungulay kahapon. Wala naman nakilala ni Dofitas kun sin-o ang iban pa nga nagpuli sumbag kay Cajilig.Gindakop si Dofitas kag ginpreso.

Gin-utdan man sila sang kuryente pero nakahingagaw sila bayad sang P26,000 nila nga billing kahapon kag na-reconnect naman subong nga aga ang ila linya.

Gin-ako ni Dofitas nga binudlayan sila sa pagbayad bangud naapektuhan man sang COVID-19 pandemic ang ila negosyo.

Ginsugid niya man nga nakapalapit siya sadto sa opisina sang MORE Power kag naistoryahan ang parte sa amat-amat nga pagbayad pero ginhambalan siya nga siya na lang ang bahala.

Dugang pa ni Dofitas, wala niya gina-kwestyon ang iya balayran pero nag-ayo siya kahapon nga tingbon niya lang ang pagbayad sa Marso 22 nga amo ang due date sang iya current bill pero wala gid siya ginpamatian. | via Aksyon Hotline