Pagpatuman sang physical distancing, isa sa mga panghangkat sa ginhiwat nga political rallies sa probinsya sang Iloilo
ILOILO – Wala sang insidente nga na-record ang Iloilo Police Provincial Office (IPPO) sa ginhiwat nga political rallies sang duha ka tandem sang presidential kag vice presidential candidates sa probinsiya sang Iloilo.
Pebrero 24 sang naghiwat sang political rally sanday Presidential candidate Ferdinand Marcos Jr., kag Vice Presidential candidate Sara Duterte sa Barotac Nuevo, Iloilo.
Pebrero 25, naghiwat man sang mini rally ang mag-tandem nga Presidential candidate Leni Robrero kag Vice Presidential candidate Kiko Pangilinan sa pila ka banwa sa probinsiya.
Suno kay IPPO Director Police Colonel Adrian Acollador, ang pagpatuman sang physical distancing lang ang nabudlayan nila ipatuman bangud tuman ka damo sang tawo nga nagtambong.
Gin-athag ni Acollador nga para lang sa peace and order ang ila papel sa ginahiwat nga mga political rallies kag iban na nga ahensiya sang gobyerno sa iban nga aspeto.
Sa pihak sini, ginpasiguro man niya nga preparado ang kapulisan sa probinsiya para sa hiwaton nga political rallies ilabe na sa pagsugod sang campaign period sa local positions.
