Bangkay sang babaye nga nasulod sa sako kag ginhal-id sa kilid sang highway sa Brgy. Pasil, New Lucena, gin-identify sang iya pakaisa nga amo si Jonalyn Jaranilla Sucaldito sang Pototan
ILOILO — Nakumpirmar nga babaye ang nasulod sa sako nga nasapwan sa kilid sang karsada sa Brgy. Pasil, New Lucena Iloilo mga pasado las-6:50 kaina sang aga.
Natapik sa guwa sang sako ang papel nga may nasulat nga “HAYOP!!! KA JOVAN ABANTAO AT ALYAS SUPAT!!!”
Sang gin-check sang SOCO ang sulod sang sako, nakuha ang itom nga sling bag nga may unod nga IDs, resibo sang Palawan pawnshop, sigarilyo kag duha ka sachets sang suspected nga shabu.
Nakabutang sa IDs ang pangalan nga Jonalyn Jaranilla Sucaldito sang Brgy. Nabitasan, Pototan, Iloilo. Ginkumpirmar naman sang iya pakaisa nga si Jonalyn ang nasapwan.
Suno kay Connie, Pebrero 28 sang katapusan niya nga nakita ang iya pakaisa sa iya balay sa Brgy. Nabitasan. Wala man suno kay Connie sang kontra sa ila lugar si Jonalyn.
Suno naman sa 17-anyos nga bata nga babaye ni Jonalyn, las 10 sang aga kahapon, Marso 1, naghalin ang iya iloy sa ila balay pero wala nakahambal kun diin siya makadto.
Nakatawag pa sa iya kahapon sang hapon ang iya iloy kag nagtugon nga indi pagpabay-an ang iya mga utod.
Namangkot pa ang iya iloy kun ano ang gusto niya nga ipadala.Kagab-i, gintawgan niya ang iloy apang wala nagasabat.
Gin-private message man niya sa Facebook Messenger ang iloy sang nakita nga active ang account apang gin-seen lang.Ginpahayag sang bata nga wala sang kontra ang iya iloy.
Gin-ako sang bata nga nakaagi gamit sadto sang illegal drugs ang iya iloy sang naga-estar pa sila sa Iloilo City, pero nag-untat sang nagpauli na sila sa Pototan.
