7 ka ruta, idugang sa Iloilo City sa tiun nga magsugod ang implementasyon sang LPTRP
ILOILO CITY – Dugangan ang ruta sang mga jeepneys sa Iloilo City agud indi mahul-an ang mga pasahero sa tiun nga ipatuman ang Local Public Transport Route Plan (LPTRP) sugod sa Hunyo 12.
Suno kay Public Safety and Transportation Management Office (PSTMO) Head Jeck Conlu, “seven ka bag-o nga mga ruta ang gin-design para mag-connect sa aton nga mga district diri sa aton nga siyudad. Amo ni siya ang na-design naton nga gin-approve sang DOTr (Department of Transportation).”
May jeepney nga mabyahe:
Tagbak Terminal via Jaro pa-Atria sa Mandurriao
Tagbak Terminal via Coastal road pa-La Paz
Ungka Terminal via Diversion Road pa-University Visayas (UP)
Ungka Terminal via Jaro pa-La Paz (ISAT-U)
Mohon Terminal via Sooc pa-Mandurriao (Megaworld)
Mohon Terminal pa-City Proper
La Paz via Nabitasan, La Paz pa- Mandurriao (Festive Walk Transport Hub)
Puwede pa suno kay Conlu nga ma-amend ang ruta kun may makita nga deperensiya bangud ginhatagan ang siyudad sang anum ka bulan sang DOTr nga obserbahan ini.
“May joint monitoring team para mag-observe gid…may mga feedbacking man kami nga kuhaon para nga kun may kinahanglan gid nga ipa-amend naton, mapadala kita sang amendment sa aton nga DOTr. Six months ang ginhatag nila,” dugang ni Conlu.
Mapaguwa sang mapa sa masunod nga semana ang PSTMO sa mangin bag-o nga ruta sa siyudad agud magiyahan ang mga commuters.
Sa tiun nga ipatuman ang LPTRP sang siyudad tubtob na lang sa perimeter boundary terminals ang tanan nga provincial jeepneys, lakip na ang mga halin sa first towns pareho sang Oton, Leganes, kag Pavia.
