Jetti Gasoline Station sa Tabuc Suba, Jaro, ginransak; Ginabanta sa P1.6 million nga cash, nadula

ILOILO CITY – Ginransak ang Jetti Gasoline Station sa Brgy. Tabuc Suba, Jaro kaina sang kaagahon, Hunyo 7.

Suno kay Punong Barangay Joel Jabonillo, pasado las-singko kaina sang aga sang gin-inform siya sang tag-iya sang gasolinahan sa natabu.

Sa na-capture sang CCTV camera, pasado las-dos sang kaagahon sang ginsulod ang opisina sang gasolinahan. Nag-agi sa kisame ang duha ka suspek, suno kay PB Jabonillo.

Suno kay PCPT Eduardo Siacon, hepe sang Jaro Police Station, padayon pa ang inventory sang mga nagkaladula. Pero sa initial nga report, P1.6 million ang nadula.

May nakita nga hagdan nga posible amo ang gingamit sang mga suspek agud makasaka sa dingding antes nagkamang sa kisame pasulod sa opisina.

Nagapadayon ang imbestigasyon sang mga pulis. — with reports from Robert Pacardo