Lalaki nga nagpangbuno sa mga pasahero sa sulod sang Ceres bus sa Ajuy, ginpasakaan na sang kaso
ILOILO — Napasakaan na sang kaso ang 41-anyos nga lalaki nga nagpangbuno sang mga pasahero sa sulod sang Ceres bus sang Hunyo 7.
Suno kay PCpl. Aron Animas, imbestigador sang Ajuy Municipal Police Station, kaso nga three counts of frustrated homicide ang gin-file batok kay Rodel Ilagan, 41-anyos, sang Cubay, Jaro, Iloilo City.
Nagapabilin nga confined sa ospital ang mag-live in partner nga sanday Mea Panes, 24-anyos kag Jeramil Perez, 31-anyos suno sa ila himata nga si John, samtang yara naman sa Estancia, Iloilo ang ila tatlo ka tuig nga bata.
Dugang pa ni John nga posible may sintomas sang pagka-trauma ang bata bangud sang natabo, pero ginalingaw na lang nila kag padayon nga gina-estorya.
“Daw ginatabunan niya gid bala ang iya nga mata kun magtulog. Daw ginalingaw-lingaw gid siya namon para indi niya na maisip [ang natabo kahapon].” ang pahayag ni alyas John.
Ginpahayag naman ni John kag sang pulis nga posible naka-droga ang suspect rason nga nagpangbuno.
Suno pa sa iya nga base sa pahayag sang iban nga preso sa Ajuy police station nga naka-estorya sa suspect nga nasal-an niya nga pulis ang biktima nga si Jeramil rason nga ginbuno.
