Iloilo Governor Arthur Defensor, Jr., ‘highest spender’ sa mga nagpadalagan sa probinsya — Provincial Comelec

ILOILO — Nagdangat sa P1,203,165.95 ang gindeklarar nga amount ni Iloilo Governor Arthur Defensor Jr. sa iya ginpasa nga Statement of Contributions and Expenditures (SOCE) sa provincial COMELEC.

Suno sa provincial COMELEC, si Gov. Defensor Jr ang “highest spender” sa mga kandidato nga nagpadalagan sa probinsiya.

Indi naman makapati ang gobernador nga siya ang may pinakadako nga expenditures sa probinsiya.

Ginbuyagyag niya nga personal nga naghalin sa iya ang iya gingasto kag wala siya sang may nabaton nga sponsorship halin sa mga pribado nga indibidwal.

Mas manubo ang gasto sang gobernador kun ikumparar sang nagligad nga eleksyon.

Ginatan-aw naman ni Gov. Defensor Jr. nga dako ang ginbuhin sa iya SOCE bangud nga wala siya sang mabaskog nga kasumpong sa pagka-gobernador.

Dako naman nga porsyon sang gasto sang gobernador ang ginbayad sa mga personnel nga nagbulig sa iya pagpangampanya.